يامل عين كل ماخيمّ اللّيل= وانكف خالي البال واطفى سراجه 


يشب فيها هم مبطي بها محيل =راحت سنين العمر ماجا انفراجه


وخيول فكري مربطاتٍ لها صهيـل= تبي الفضاء وانا مجــوّد سياجه


تشره علي العين وتعمعـم الخيل= وانا اعترف خليتها لوقـت حاجه


وجدي على راعي العيون المضاليل= اللي سكن قلبي وحـافه وداجه


كل السنين المـاضيـه والتعـاليـل =مـاغيرت من بسمته وابتهاجه


اجيه ساري واشتهي ضمته حيل= ويملّكن عــرشه وفرشــه وتاجه


يزود لي بالكيل وازيد بالكيـل= وان قلت يكفيني تعكّر مزاجه


دلـّـوع لكن بالغـلا ماهو بخيـل= بعيـد عن درب الردا والسـماجه


ماله علي مدخل ولالي مداخيل =غيـر النصيـب ووقفتــه ونعـواجه


وجـهـه بقالي ودمعتيـنٍ به تسيـل= ونظرة قهــر يخفي وراها انحراجه 


يفوح قلبي مثل فوح المعاميل= واسمع براسي لاذكـرته لجاجه


بيني وبين الهـم عشق وتهاويـل= كنــي حبيسٍ من عناه بزجاجه


مهموم من قل الفرج والمواصيـل= ومرتاع من عقد الزمن لي حجـاجه


يبست مواريدي وانامحتري السيل= والهم علق بالمحاني حراجـه


ياحظي اللي طايحٍ مابه الحيـل= على فـراشـه مستحيلٍ علاجـه


اتعبـني الماخوذ بالحط والشيـل= لاقـام من نومه تفتـح خــلاجـه


متى على الله بالسمايطلع سهيل= كود المطريقطع طريق العجاجـه


مادام ضاع القفل ماينفـع القيـل =ولاينفـع المفتاح كثرة اولاجـه


يادق قلبـي بالنجر دقـــة الهيـل= قام يتهشم من كثـر مـايـواجـه


علـى السنين الفايتـه دون تحصيل= وزرعٍ يبس قبل يتـهيـا خراجـه


ياكثر ماعــدلتـها وترجع تمـيـل= واليـاس دربٍ مابغيـــت انتهاجـه


لكن على الله يالدروب المقـابيــل= يمكـن يزينها الولي بانفراجـه