عقب السنين الممحله جيت مرار=ومريت بيتٍ بالعدامه مكانه


بيتٍ شهد احلى سواليف الاقمار=واحلى علاقات الهوا في زمانه


كن الليالي ماتعدت بالاعمار=رغم السنين اذكر تفاصيل شانه


لا ياحسافه راحو اللي به ازهار=معاد به شيٍ يعوض حنانه


بالقلب يزفر ياحمد لاهب النار=على عشير ٍ ياحمد صنف دانه


كانت تسامرني الليالي بالاشعار=وانا وقلبي رهن شارة بنانه


لاقلت مالي نفس بالشعر تنهار=وتقولي تكفا حبيبي ..امانه


كنت اكتب اسمه كل ماكنت محتار=بالارض والدفتر على غير فانه


كانت معي مثل السحابه والامطار=كانت فريده بالحلا والرزانه


كانت تقول ان الزمن شي غدار=وانه بدوني مالها اي خانه


دار الزمن واكد على قولها ودار=وبين بغيبتها الزمن وامتحانه


يانجمةٍ ضيعتها والغلا حار=وياوردةٍ قطفتها قبل اوانه


ابيع عمري لو تجيني بالاخبار=وارهن لها قلبٍ ضلمها رهانه


والله مادري ياحمد وين هو صار= من رحت ماخاطب لساني لسانه