سلام مني والمعاني غزيره=اجمل سلام معطرٍ عند ابو سيف
سلامٍ ازكى من الورود وعبيره=سلام لعيسى والتحايا مراديف
ابشرك احوال حالي ستيره=ميسره .....لا ما علينا تكاليف
ما همني إلباس جوخ وحريره=متواضعٍ ما اشقى بفتح المظاريف
سبحان ربٍ كلنا نستجيره=سبحان رب ٍ صنف الخلق تصنيف
الطيب واجد والمراجل كثيره=الطيب والله ما يجي لك على الكيف
الطيب من الله والمعاني كبيره=الطيب مثل الحر بروس المشاريف
الطيب مثل العود الازرق مصير ه=يفوح ما بين المعازيب والضيف
الطيب يا هل العرف عيسى اميره=لا تتعبون اركابكم يا هل الزيف
عيسى براد الطيب وغيره هجيره=غيره محل للطيب وعيسى هو الريف
خوتك تاج الراس ولا اريد غيره=صديقي اللي انتخي به عن الحيف
ابوي علمني عسى الامر خيره=ان الرجولة تنعرف بالمواقيف
وانت يا عيسى تروم العسيره=يسرى بها خنجر ويمنى بها سيف
ما عرفك لكن هقوتي بك سفيره=علمك غانم ما يبي له تعاريف
لا صرت من زهران عز العشيره=عدوهم يموت من غله معيف

يا مرحبا يا أهل الحدود الشطيره=ياللي لكم في كل ديره معاريف
صبيان وايل يا القلوب الجسيره=يوم الولاول و اللظى و الغطاريف
روس عنزة و محكّمين الجزيره=سقّايةَ العذبه على مالح السِيف
و يا أبن الغضوري يا نقاء السريره=يا راية(ن) بيضا و لا مثلها شِيف
يا شايم(ن) عن كل ما شحّ خيره=و لطيبتك تعجز عليّ التواصيف
مثل النفل وسط الرياض الخضيره=يفوح قولك و المعاني مكاليف
تكلف لمثلك يا مناصح شويره=لا جاك مغشوش(ن) بكثر السواليف
لك الله إنّه ما غشى القلب حيره=وأدري بك إنّك من رجال(ن) مصاليف
أهل الوفا في كل سيره و ديره=زبّانة المجفي و قرّاية الضيف
و إن كان بدعك سيف هذا جفيره=و يشتاق له شوق الحمام المواليف
و إن كان برقع فأبشر براس طيره=قول(ن) يجي من عاليات(ن) شواعيف
يا مورد(ن) بحر القوافي لبيره=ومرويه من عذب المعاني على صيف
و محلل(ن) هماج ملحه و جيره=و مقهوي(ن) حرفه على صافي الكيف
يفداك من حمّل قصيده زفيره=و يجزاك خير مصرّف الخلق تصريف
و يعزّ وجهك عن لهايب سعيره=و يجعل لك الجنه مقام(ن) وتشريف