ياسيف خلوني على كيفي اسير=حتى يطيب القلب وانسى جروحي
في روضة خضرا يغرد بها الطير=والنار مشبوبه ودله تفوحي
ريح النفل وسط الرياض المزاهير=هي منوتي يا سيف واغلى طموحي
مع البدو شوف النياق المغاتير=يطرب لها قلبي ووقتي شحوحي
يا ما حلى يا سيف جمع الصقاقير=وخوة نشاما هرجهم به مزوحي
يشوقني صوت الرعد تالي عصير=وبروق من خلف السحايب تلوحي
ارتاح ليا هل المطر واسهب الخير=ثم ادلهم السيل يدرج نزوحي
وناستي يا سيف بالبر انا غير=الضيقة اللي وسط صدري تروحي
يا سيف انا بوقت ما اقوى المقادير=اكتم هموم القلب ويزيد نوحي
الله يا وقتٍ مضى لي وانا صغير=مرتاح ما فكر وبالي سموحي
يوم اتذكر ربعنا والمسايير=وهب البراد بذعذعٍ له لفوحي
عشقي شمال ونبض قلبي جماهير=هذا منايه كان يا سيف توحي


رد ي على لسان سيف

يا بوي ريح من كثير التفاكير=وبكل هدوء اقرا تعابير بوحي
اللي تبي يا بوي والله بيصير=ولا ترك الضيقه بقلبك تموحي
لو كان خاتم غايص بقاعة البير=تبيه اجيبه ما اتوانا بروحي
الجيب والم والدلال الغنادير=مع طلعة النجمة ترانا سروحي
والظهر نغدي بين لينه وخوير=وناخذ لنا سجات بذيك السفوحي
وصلح الدله وتنادي الطير=طير السعد يا بوي حرِ ذبوحي
ابيك تهيجن بالرياض المناوير=صوتك طرب يا بوي يشفي جروحي
قبل الغروب شوي ناخذ مشاوير=بخب النفود اللي هواها شروحي
وبعد الغروب يا بويه نواصل السير=نسري بهداج الليل قبل الصبوحي
يم الشمال اللي زهى بالمناعير=رجال تبني بالمعزه صروحي
انا سند لك بالليالي المعاسير=فزعة حصانٍ بالمعارك جموحي