اجمع ظلام الليل افتش عن النور=من غيبتك ما ذقت طعم السعاده
ادور والدنيا بعنى حالي إدْور=ولا لقيت من الألم لي وساده
الهم فيني وسط صدري له قبور=والمقبرة وسط الحشاء من القراده
مستور يا دمعي عسى دوم مستور=احب فيك الصبر عز وجلاده
خلك ما بين الجفن والعين مدحور=لا تنهمر عند العدو في زياده
راحت وخلت قصرها اليوم مهجور=ولا بد ما ترجع على القصر غاده
القلب سخرته لها إحساس وشعور=ولا غيرها بالقلب يملك سياده
قبل امس جتني بالورق جملة سطور=رسالةٍ منها وتثبت وداده
تقول نسّيت بالقصر غرشت عطور=ونسّيت خواتمها وحتى القلاده
تنشد عن اخبار الحديقه مع السور=وريحانةٍ كانت اساس السعاده
قلت ارحبي وانا من سرور لسرور=ترى التسامح من صفاتي وعاده
قلت اسمحي لي اعترف لك بلا غرور=كنت ادري انك راجعه للقياده
وترى مكانك فارشه ورد وزهور=ومعطره بعطور وانتي مداده