صبا نجد اشعلت نار القصيد وضج بالمربـاع=هزيم الشعر وفياض الورق ضاقـت بودانه

وهبـت من شماله ريح خيـر وجالهــا ذعذاع=تسوق الغيم بأمر الله من الرذراذ غرقانـه

تلـمّـه تجمعه حتى لعـج برقه وحن وماع=عطـى ربٍ لـه المنـه كريم وجـل سبحانه

بكت عين السحابه وإنتثر دمـعٍ سقى له قاع=تغـيّـر وجه الأرض وسـيّـل الوادي وشعبانه

وقال اللي يخيلـه تـو ماغيّـم وهل بسـاع=يارزق الله زهــى لون البرد بأطراف غدرانه

وحالوا لـه بدو من عام الأول طرشهم ماراع=عقـب ماجاء الخبـر كلٍ شعـى ذوده وحيـرانه

وانا مثل البشر نفسي لها لاجاءالمطرمرتاع=تحس إنـه تذكّرهـا زمـانٍ طــال نسيـانـه

تطيب إمن الجروح المدميات وتنوي المطلاع=تبي روضٍ تساوى نبـت زملـوقــه وبركانـه

ويفرح خافـقٍ من جور وقته والشقا ملتاع=مـن الفرحه قعد يكفـخ يطيـر إطيار شيهانه

تولّـم للهجوس اللي تجيه افراد غير أجماع=هواجيـسٍ حداهــا الشوق مـن عامين حيرانـه

طرت له بنت عودٍ لاطرت منها شكى جزّاع=غلاهــا مرمـسٍ بـه والجفـا والبعد عنوانـه

عنود الريم تلعـا جيد عنقا والعيون وساع=تراخـى رموشها لاسلهمـت كســلا وخجـلانـه

تناشـا من جسدهـا ريح مسـكٍ خالطـه نعناع=غذا شعـرٍ بدى لون الذهب مـن جملـة ألوانه

سقتنى من غلاهـا كأس فيه من الغرام أنواع=شربتـه مهتـوي والكبـد ولهــانه وضميـانه

رغم كل الغلا مانيب لامسرف ولا طمّاع=وهـي بنت الحمولـه ماشكـت فرقاي لـ فلانـه

حفظهـا الله جزاهـا خيـر سري عندها ماضاع=وأنـا كنـي نسيتـه ليـن هل الغيم ودانه