دكتور عالجنـي دمـى الجـرح ماطـاب=تكفى تطبـب فيـه وأوقـف نزيفـه

حاول وأنا ادري صعب مع نزفه أطباب=مــن يوقفـه لاسـال وادي حنيفـــه

وأرجـوك لاتسـأل عـن ظـروف وأسبـاب=مـامـن إجابـه وإعتبرهــا كليفـه

دون الإجابـه يوصـد العـرف الأبـواب=دايـم ربيـع القلـب يـسّـتر خريفه

مايقّـدر لسانـي يسولــف ويغتـــاب=قلـبٍ حفـظ سـره ولا أرخص وليفـــه

من عـادتـه مايفشـي أسـرار الأغراب=وشلـون عـاد أسـرار أخـوه وحليفه

لا حـس أخوه القلب يدمــى ومنصــاب=يجـرح مـن الحسـره لهاتـي رفيفـه

دكتـور عاده وش ورى فرقــا الأحباب=إلاّ سهــر عيــن وحيــاةٍ كسيفـــه

دكتــور والله لـو تكلّـمت بإسهـاب=عــن قصتــي تظهـر نتايج مخيفــه

إكشـف على قلبي وأكيد أنت تـرتـاب=مـاعـاد باقــي غير ربع النصيفـه

صـارت معاليقـه حطـب شــوق شبّــاب=يطــرد غـلا مـن سـامر الجفن طيفه

يامـا نصحتـه ميـر مـاطاع مـاتـاب=قلـبٍ يعــانـد والشقــى يستضيفـه

دكتـور هـذا الوضع لو صاب لو خـاب=هــو فالنهـايـه جـرح قلب ونزيفه