ياللي غيابك ماوصلني له اسباب=إلا همومٍ للغباين مناديب
غبتي وكن الناس بغيابك إغياب=أثر الغلا ماله بدونك معازيب
يابنت لا تبطين بعيون الاغراب=نظره غريبه في هدبها مخاليب
وينك تعالي للولع جيت شبّاب=وأرقى بشوقي عاليات المراقيب
ودي صراحه تشتغل نارنا احباب=بقلبي وقلبك والمشاعر مشاهيب
دام الرجاء في موعده طاب ماخاب=لاتتركين اشواقنا للهباهيب
ترى الجفى من عادته يوصد الباب=حتى يعكّر صافيات المشاريب
مكروه يطعن فالعلاقه ويغتاب=صدق الغلا وإلا يحش العراقيب
ياكم غرز بقلوب الاحباب من ناب=يجرح ولا يمكن لجرحه تطابيب
اكيد مايسلم قريصٍ من الداب=والى سلم يسلم سلامة معاطيب
لاتمنحينه فرصته يكسب ألقاب=ضرب الجفى بمواصل الشوق تأديب
يالغايبه وينك بدى القلب يرتاب=بين الرجاء والياس فرحه وتأنيب
وينك مكانك في حناياي ترحاب=ينبت غلا هذي عذوقه مراطيب
كان الغياب إيبرره حكم الاقراب=فأنا صبرت وللمحبه مواجيب
وكانه جزاء عن ناظري ناظرك غاب=والله لجازي شوف عينك ولغيب