يوم انشدوني عن دموعي وأنا أمك =جاوبتهم وأبعدتهم عن طواريك

ما أبغى أجرحك في كلمة تزيد همك = ما أبغى أقول إن السبب من تجافيك

يوم لمست الصدر في يوم ضمك =نسيت أنا اللي حولي وقمت أبكيك

ما أدري عايش وأرتجي لمس جسمك = أو ميت وأقول يرحمـــك والــــــيك

ياما سهرت وزاد غمي لغمك = ماارتاح لين تهتني في لياليك

وياما الى طولت نومك أشمك = وأتأكد إنك عايش لي وأرجيك

وياما زعلوا مني خوالك وعمك = وياما هجرت أقرب قريب ضحك فيك

وياما ذرف دمعي إذا سال دمك=براءة الأطفالِ ماهي بتنهيك

وياما انتظرتك عند بابي وأنا أمك = وأقول في يوم تجيني وأحييك

أخاف من يوم يجيني يغمك = ويجيك علمي مع عزيز يعزيك

أنا على الله داخله ثم لمك= ارحم قليب تالي الليل يشكيك

فكر بمن صابها الضيم وظلمك = واذكر حشاً ضمك وعسر المساليك

ودي أشوفك قبل يومي ويومك = لــو مـــرة بالعـــام الله يخلـــيك

ما أبيك تقطعني إذا أمري يهمك =بقعد معك وأضحك وأسولف وأحاكيك

ياوليدي أذكر كلمة قال فمك = لا قلت كلمة ( يوه ) قلبي يلبيك

واذكر زمانِ به فراشي بجنبك = وليا اشتكيت تقول يمه وأسميك

ولا اشتد مابك فوق كتفي أزمك = ماارتاح لحظة لين ربي يعافيك

والختم لا جتك الرسالة وأنا أمك = إما تجي وإلا أنا ازحف وأجيك