أنا لي ثمان ليال نومي على الكوعين = اجر الونين ودمعة العين اداريها

ومن شاف حالي قال وشبك علامك شين = توفوا هلك والا بك امراض تخفيها

وانا اسباب مابي يابو يوسف كحيل العين = ابو وجنة ٍ كن القمر ساطع ِ فيها

غزال ٍ صغير السن تو النهود تبين = كما طلع تفاح احمر اللون كاسيها

رشيق القوام ادعج غنج نابي الردفين = اهو علتي ودواي مابين اشافيها

صدفته على جيب ٍ كويتي موديل الفين = ومن بعد ماشفته وانا رايح ٍ فيها

نظرلي بنظره كنها طعنة السكين = وتبسم وزادت علتي كيف اداويها

الا يامحمد حال نادر مابين وبين = مابين الرجا والياس والله يسويها

تولعت به لوكان ويني وداره وين = وجيت اشتكي لك يمكن الروح تحييها

لكن حط في بالك تراني قتيل العين= ضحيه لنظرة بنت ٍ الله يحميها