لاح الحزن في ليلة واجهر الشــــــــــوف=يبرق ويرعد في النواظر سحــــــــــابه

بين النواظر صار بين ومكشــــــــــــــوف=في ساعة نوخ وعقل ركــــــــــــــــابه

من سبة اللي مات وعيوني تشــــــــــوف=فوق الصدر نزاع الأرواح صـــــــابه

جاه ونزع روحه واخذها من الجـــــــوف =قدام عيني راح مني نهــــــــــــــــــابه

مات وترك راسه على الصدر منســــوف = جسم بليا روح كل درى بـــــــــــــــــه

وصار الحزن في خاطري يشهر سيـــوف=وقطع خفوقي يوم فسخ ثيـــــــــــــابه

وفسخ وغسل ثم طيب وانا اشــــــــــــوف=وكفن ودمعي مثل وبل السحــــــــابه

عقب الفجر شلناه للعود منســـــــــــــوف=على النعش ما يوحي اللي حكـــــابه

ونزل بقبره بين الأعضاد ملفـــــــــــــوف=ومدد ومن حوله جميع القـــــــــــرابه

وحطيت لبنه تحت راسه كما النــــــــوف=وفكيت عن وجهه بيدي حجــــــــــابه

وصفوا عليه من اللبن عدة صفــــــــوف=وخلطت من دمعات عيني ترابــــــــه

وقاموا يهلون الرمل هل بكفـــــــــــــوف=لين اندفن قبره ونصب نصـــــــــــــابه

وقمت اتعبر والعرب حولي وقــــــــــوف=حول القبر قلبـــــي تزايد عذابـــــــــه

ذكرت ابوي اللي مع الناس معــــــروف = بحسن التعامل والوفا واللبــابــــــــــه

أمس يكلمني وينطق لي حـــــــــــــــروف=وإلى من تكلم خاطري يهتنى بــــــــــه

واليوم فارقني ورافقنـــي الخـــــــــــوف=والقلب للهوجاس منفج بابـــــــــــــــه

ياليت موتي كان من قبل لا اشــــــــوف=ليته سطا بي وتركه ما سطا بــــــــــه

لا شك هذا الموت والموت معــــــروف =إلى جا يسل الروح محد درى بـــــــــه