الا يابساط ناديتك وتـوّك جيتنـي هالحيـن=بعد ماغاب عنّي يابسـاط الريـح وأشقانـي
بعد مايبست اوراق الغرام بحلمـي المسكينـ=بعد ماودعت شمس الصبـاح ورود بستانـي
أنا أذكر يابساط إني تمنيتـك قبـل عاميـن=قبل لاتغرد طيور الشقى في عالـي أغصانـي
قبل لايعشق الليل الكئيـب عيونـي الثنتيـن=قبل لا تسكن دموع الـوداع بداخـل أعيانـي
قبل لاتفقد شموع الغـرام مسامـر الغاليـن=قبل لاتذوب همسات الحنين بداخـل لسانـي
قبل ماهاجسي يبحر على مركب ولا أدري وين=إلين أبكي وأعرف إنه على المحبوب ودّانـي
أحبه كثر ماسالت دموعه من علـى الخديـن=كثر ماأبكيت له عيني وهو يبكي على شانـي
كثر مامر بأوراقي قبـل لاأكمـل الشطريـن=تصوّرلي وأنا بكتـب قصيـد بواحـدٍ ثانـي
الا ياطيفه المجنون جيت منيـن وإلا منيـن=دخلت وعنـك ماكنّـي مسكّـر كـل بيبانـي
أنا ماقلت لك تكفـى تريّحنـي ولـو يوميـن=أبي أرتاح من ليل الهموم السـود وأحزانـي
على كف القدر نمشي مثل ماالناس به ماشين=وأنا كف القدر قدّر علـي ماشـوف خلانـي
ولكن يابساط الريح دامـك جيتنـي هالحيـن=مابيك تروح وأنت الي مشيت وجيت لي عاني
أبي هالحين تاخذني تودّينـي بـلاد الصيـن=عشان طيوفهـا لاجـت تدوّرنـي ماتلقانـي